Делегация құрамында Ауыл шаруашылығы, қаржы, қорғаныс және аэроғарыш министрліктері мен «Атамекен» ҰКП, Ұлттық аграрлық ғылыми-білім беру орталығы және «KAZNEX Invest», «ҚазақстанИнжиниринг», «Азық-түлік келісім шарт корпорациясы» ұлттық компанияларының өкілдері бар.

Жұмыс сапарының басты мақсаты – Мемлекет басшысы Н.Назарбаевтың «Қазақстанның үшінші жаңғыруы: жаһандық бәсекеге қабілеттілік» атты Қазақстан халқына Жолдауындағы АӨК-ке шетелден инвестиция тарту бойынша берген тапсырмаларын жүзеге асыру және екі жақты тиімді келісімдерге қол жеткізу.

Сапар аясында екі ел арасындағы келісімге сәйкес 2017-2018 жылдарға арналған ауыл шаруашылығы саласында ынтымақтасу бойынша Жол картасына, Қазақстан аумағында Израиль агротехнологиялық фермаларын құру ниеті бойынша Декларацияға қол қою және әлеуетті израильдік инвесторлармен бизнес-форум өткізу жоспарлануда.

Израиль Мемлекетінің географиялық жағдайының ауыл шаруашылығын жүргізуге аса қолайлы болмауына қарамастан, аталған сала бұл ел үшін зор маңызға ие және жоғары деңгейде дамыған. Яғни, бұл ел – балғын өнімдерді сыртқа шығаратын ірі экспорттаушылардың бірі және ауыл шаруашылығы саласы бойынша әлемдік көшбасшы болып табылады.

Сапар барысында А.Мырзахметов Израиль Мемлекетінің ауыл шаруашылығы және ауылдық аумақтарды дамыту министрі, Кнессеттегі «Еврей үйі» партиясының депутаты Ури Ариэлмен кездесіп, тиісті құжаттарға қол қойылады деп күтілуде.

Сондай-ақ, делегация мүшелері ауыл шаруашылығы саласындағы жаңа технологиялармен айналысатын «Volcani center» ғылыми-зерттеу институтына барады. Мұнда біріккен зерттеулер мен жас мамандарды даярлау мәселелері қаралады.

Бұдан бөлек, Қазақстан аумағында Израиль агротехнологиялық фермаларын құру ниеті бойынша Декларацияға қол қойылып, олардың кешенінде ауыл шаруашылығының әралуан бағыттары бойынша технологияларды таныстыру талқыланады.

Инвестиция тарту және отандық өнімдерді экспорттау үшін «дөңгелек үстел» форматында израильдік агробизнес өкілдерімен кездесу өткізу де жоспарда бар.

Тағы бір айта кетерлік жайт, тәжірибе алмасу үшін делегация мүшелері «Гранот» ауыл шаруашылығы кооперативі мен Су ресурстарын үнемдеу және басқару компаниясы жұмысымен танысады.