Аргентиналық музыкант Эдуардо Пандольфо оң қолының туа бітті кемдігіне қарамастан, толыққанды басист атанды. Оның Youtube-тағы бейнежазбаларын күн сайын мыңдаған адамдар тамашалайды. Алайда Эдуардоға қиын тиетіні физикалық кемшілігімен күресу емес, айналасындағы өзге адамдардың ала көзіне қарсы тұру деп хабарлайды Sputnik Mundo. Пандольфо 60 жыл бұрын "талидомид апаты" өршіп тұрған кезде дүниеге келді. Бұл кезеңде, яғни 1957 мен 1963 жылдар аралығында көптеген әйелдер жүктіліктің бастапқы кезінде жүрек айнуын басу үшін талидомид қабылдаған. Бұл дәріні қолдану салдарынан, дүние жүзіндегі мыңдаған балалар кемтар болып туылды. Пандольфо фокомелия туа бітті сырқатына шалдыққан, яғни  оң қолы толық жетілмеген. Эдуардо кішкентай күнінен музыкаға құмар болыпты. Ол ән айтып, саусақты қажет етпейтін ауыз сырнайда ойнап үйренген. Бірақ 17 жасында алғаш рет қолына бас-гитараны алып, содан бері тастамай келе жатыр екен.