Елордадағы №6 қалалық емхананың бас дәрiгерi Динара Байсеркинаның айтуынша, ашық есiк күндерi 60 жастан асқан қарттар тексерiледi.

«Емханамызда кешеден бері қарттар күнi аталып өтуде. Кеше оларға арнап арнайы мерекелiк шара ұйымдастырылды. Шағын концерт көңiлдi өттi. Жиналған қарттар ән айтып, би билеп, жаттығу да жасады. Олардың көңiлiн көтеруге емхана ұжымымен бiрге ерiктiлер, яғни медициналық колледж студенттерi атсалысты. Қарттар көбiнесе кардиолог, эндокринолог пен невропотолог мамандарына тексерiлiп жатыр. Пульмонолог пен ревматологқа да қаралып жатқандар бар. Олардың арасында артериялық гипертензия, жүректiң ишемиялық аурулары, қант диабетi кең тараған», - дейдi бас дәрiгер.

Д.Байсеркинаның айтуынша, ашық есiк күндерi пациент өзi тiркелген учаскеге қаралады. Дегенмен, денсаулығы сыр берген қарттарға тiркелмесе де, алғашқы көмек мiндеттi түрде көрсетiледi.

№6 емханаға ашық есiк аясында медициналық көмек алуға келген пациент Жұмакүл Жанабаева бұндай акциялар халыққа өте қажет екенін айтады. Астана тұрғыны қан қысымы жоғары болғандықтан дәрiгерлердiң тұрақты бақылауында екен. Ол да бүгiн терапевке қаралуға келiптi. Пациент науқастардан көмегiн аямайтын ақ халаттыларға алғысын айтып, қарттарға ем мен жылы сөзден басқа еш нәрсе керек емес екенін атап өтті.

Айта кетейік, қазақстандықтар 1 қазанда халықаралық қарттар күнiн атап өтедi.