«Мәслихат – бұл мемлекеттік басқарудағы халықтың дауысы» деген Мұқашев өз сөзінде осы жылдар ішінде мәслихаттардың саяси институт ретінде өзін дәлелдегенін, көптеген сын-қатерлерді еңсергенін атап өтті.

«Бүгінде мәслихаттар жергілікті өзін-өзі басқарудың басты буыны ретінде талай игі істердің басы-қасында жүр. Алдағы міндет – өңірлердің дамуын арттыру және азаматтардың өмір сүру сапасын жақсарту», – деді ол.

Жиын барысында салаға еңбегі сіңген бірқатар депутаттарға «Құрметті депутат» төсбелгісі табысталып, алғыс хаттар мен грамоталар берілді.

Мәслихаттардың рөлі мен даму бағыты

Өз сөзінде Төлеубек Мұқашев депутаттардың қазіргі және болашақтағы миссиясына тоқталды. Оның айтуынша, мәслихат депутаты ел ішінде тіршілік етіп, жергілікті мәселелерді жақсы түсінуі және шешуге атсалысуы тиіс. «Депутат қолжетімді, адал, жауапты болуы керек. Ол жабық кабинеттерде емес, көшелер мен егістіктерде, өндіріс басында халықпен бірге болуы тиіс. Біз халықтың үні болып, олардың сенімін ақтай білетін депутаттардың қатарын көбейтуіміз керек», – деді ол.

Мұқашев сондай-ақ депутаттардың жұмыс сапасын арттыру үшін мемлекет тарапынан кешенді жағдай жасалуы керектігін алға тартты. Оның ішінде құқықтық кепілдіктер, институционалдық қолдау, қаржылық ынталандыру мәселелері бар.

«Құқықтық база мықты болу керек. Мәслихат депутатының тәуелсіздігі, оның мандатының қорғалуы – негізгі шарт. Сонымен қатар, депутаттардың кәсіби дағдыларын дамыту үшін оқыту бағдарламалары мен семинарлар ұйымдастыру қажет», – деп атап өтті Мұқашев.

Мәслихаттардың жаңғыруы – уақыт талабы

Мәслихаттардың үздіксіз жаңғыруы мен кәсібилігін арттыру мәселесіне ерекше тоқталған төраға: «Қоғамдағы өзгерістерге бейімделу және азаматтардың сенімін нығайту – басты міндет. Мәслихаттардың заманауи жұмыс форматына көшуі ел дамуының кепілі болмақ. Біз өңірлердегі әрбір инвестицияның пайда әкелуін қамтамасыз етуіміз керек», – деді.

Төлеубек Мұқашев мәслихат жұмысына жаңа әдістер енгізу туралы жоспарларымен бөлісті. Соның ішінде әр округте арнайы кеңестер құру туралы бастама айтылды. «Бұл ақсақалдар, жастар, кәсіпкерлер және басқа да белсенді топтардан тұратын кеңестер дұрыс шешім қабылдауға, бағдарламаларды жүзеге асыруға және бюджет қаражатының тиімді жұмсалуына бақылау жасауға мүмкіндік береді», – деді ол.

Қоғамға үндеу

Жиын соңында төраға барлық депутаттарға ерекше үндеу жолдады: «Депутаттық мандат – артық мәртебе емес, қасиетті жауапкершілік пен аманат. Біз халықтың сенімін ақтап, қоғамға шынайы қызмет етуіміз керек. Қуатты өңірлер қуатты мәслихаттармен болады. Осы мұратқа жету үшін бәріміз бір кісідей жұмылуымыз қажет!»

Мәслихаттардың 30 жылдығына арналған жиын бірлік пен ортақ мақсатқа ұмтылыс рухында өтті. Ұйымдастырушылар бұл күнді мәслихаттардың жетістігін ғана емес, болашақта атқарылар ауқымды істердің бастамасы ретінде бағалап отыр.