Расымен де, ұзындығы 2200 м болатын ұшу-қону жолағына жөндеу жұмыстарының жүргізіліп, жаңа рульдеу жолағы және 2 әуе кемесі үшін перрон салынғанын жетістік ретінде айтсақ артық емес. Құзырлы мекеменің хабарлауынша, аэровокзалдың жаңа ғимараты жолаушыларды тіркеу және тексеру үшін барлық қажетті қондырғылармен жабдықталған.

Сонымен қатар, Үшарал әуеайлағына бастапқыда Астанадан аптасына 4 рет жиілікпен рейстерді орындау жоспарланған. Оларды «Жетісу авиа» АҚ әуекомпаниясы орындайды.

Айта кетейік, 2017 жылғы 21 шілдеде «Жетісу авиа» АҚ әуекомпаниясы бортында 22 жолаушысы бар субсидияланатын алғашқы рейсті орындады. Әуебилеттің құны субсидия есебімен бір бағытқа 16000 теңгені құрайды.  

Тағы бір айта кетерлік жайт, жалпы есепте ағымдағы жылдың 6 айында жолаушыларды әуе көлігімен тасымалдау 18,7%-ға өскен немесе бұл өткен жылдың бірінші жартыжылдығымен салыстырғанда 500 мың адамға артқан. 2017 жылғы жарты жылдықта барлығы 3,2 млн. адам әуе компания қызметтерін пайдаланды. Нұрсұлтан Назарбаев халықаралық әуежайының ақпараты бойынша, өткен жылдың бірінші жартыжылдығымен салыстырғанда халықаралық бағыттар бойынша жолаушылар ағынының өсімі 46%-ды (2016 ж. – 113514 жолаушы, 2017 ж. – 165435 жолаушы) және ішкі рейстерде 24%-ды (2016 ж. – 190979 жолаушы, 2017 ж. – 237309 жолаушы) құрады. 2016 жылы әуежай 3,5 млн. жолаушыға қызмет көрсетті. 2017 жылғы жарты жылдықта – 1,8 млн. жолаушыға қызмет көрсетілген. Жыл басынан бері шетелдік және қазақстандық әуе компаниялар 9 жаңа халықаралық бағытты ашты. «Ашық аспан» шеңберінде Астана – Хельсинкі, Астана – Варшава, Астана – Будапешт, Астана – Бейжің, Астана – Киев, Астана – Батуми, Астана – Нью-Дели, Астана – Ереван, Астана – Минеральные воды рейстері ашылды. Қазақстанға польшалық LOT, венгриялық лоукостер Wizz Air, финдық Finnair, қытайлық Air China сияқты жаңа әуе тасымалдаушылары келді.