52 адам қаза болған автобустағы өрттің нақты себебі анықталды
22.01.2018, 09:08

52 адам қаза болған автобустағы өрттің нақты себебі анықталды

Қайғылы жағдайға қатысты ресми деректер шықты. ҚР ІІМ министрінің орынбасары Ерлан Тұрғымбаев мәлімдегендей, негізгі болжам бойынша Ақтөбе облысындағы автобустың өртеніп кетуінің себебі отты абайсыз пайдалану болып отыр, деп хабарлады облыс әкімінің баспасөз қызметі.

"Қазіргі таңда оқиға орнындағы жұмыстар аяқталды. Қаза болғандардың мәйіттері Өзбекстанға жіберілді. Ол жақта бірқатар  геномдық  сараптамалар жүргізіліп, марқұмдардың денелері туыстарына беріледі. Негізгі болжамға сәйкес, отты салғырт пайдалану өрттің шығуына себеп болған. Оқиға орнында дәнекерлейтін шам табылды. Сонымен қатар, тергеу кезінде бес литр бензин құйылған пластмасса ыдыстың (автобуста) болғандығы анықталды" — деді Тұрғымбаев.

Оның айтуынша тергеу органдары зардап шеккендерден жауап алуды 19 қаңтар, жұма күні бастаған.

"Отты салғырт пайдаланғандығы жөніндегі болжам аман қалғандардың түсініктемелерімен расталып отыр. Автокөліктің қозғалтқышы өшіп қалып, көліктің іші салқын болған, сол кезде дәнекерлейтін шам  жылытқыш ретінде қолданылған. Ол екі сағаттан астам уақыт жұмыс жасайды. Сол кезде бес литрлік ыдыстағы бензин төгіледі де, от лап етеді. Сөйтіп, аз уақытта автобус ішіндегі азаматтардың барлығының өмірін жалмайды. Сондай-ақ, жол көлік оқиғасы немесе қандай да бір криминалдық жағдайдың болуы мүмкін деген болжамдар толықтай жоққа шығарылды. Оқиға орнын тексеру аяқталғаннан кейін аталмыш автокөліктен ешқандай суық қару, атыс қаруы, оқ-дәрі немесе сол оқ-дәрілердің қалдықтары табылмады", — деп жеткізді ҚР ІІМ министрінің орынбасары.

ҚР Денсаулық сақтау вице министрі Алексей Цой ауруханада жатқан бес азаматтың денсаулығы туралы айтты.

"Санитарлық авиация арқылы жеткізілген барлық емделушілер кешеден бері толық тексерілді.Жалпы алғанда, жағдай тұрақты, олардың әрқайсысы өздерін жақсы сезінеді. Психологтар өте белсенді жұмыс жасады, өйткені емделушілерді моральдық тұрғыдан қалпына келтіру қажет болды. Бүгін жағдай қалыпты. Зардап шеккендердің денсаулығына ешқандай қауіп төніп тұрған жоқ. Оларды ауруханадан шығаруға болады", — деп хабарлады  Цой.

Сондай ақ, жұма күні, Астана уақыты бойынша шамамен 21:00-де, өрт кезінде қаза болған 52 адамның мәйітін Өзбекстан Республикасының Төтенше жағдайлар министрлігі Ақтөбеден Ташкентке ұшақпен алып кетті.

"Ұшақ Өзбекстанға келгеннен кейін, қажет болған жағдайда, қосымша тергеу шаралары жүргізілетін болады. Мәйіттер туыстарына беріледі", — деді Өзбекстан Республикасының Төтенше жағдайлар министрі Рустам Джураев.

Ол сондай-ақ Қазақстан тарапына көрсеткен көмегі мен қолдауы үшін алғысын білдірді.

"Өзбекстан Президенті республика азаматтарының қазасына байланысты үкіметтік комиссия құрды. Комиссия мүшелері Ақтөбе қаласына жіберілді, бізге мұнда барынша көмек берілді. Жұмыс орны, көлік жедел түрде беріліп, мамандардың көмегі көрсетілді. Барлығы қысқа мерзімде жүргізілді. Мұнда барлық мәселелер толық шешілді: мәйітті анықтау, куәгерлерден жауап алу кезінде ешқандай проблемалар болған жоқ.  Осыған байланысты Қазақстан Республикасының Президентіне, Үкіметі мен осы екі күн бойы бізге көмектескен барлық министрліктер мен ведомстволарға алғыс айтқым келеді. Қайғымызды бөліскендеріңіз үшін рахмет", — деді ол. 

©sputniknews.kz

Silteme.kz ақпараттық-сараптамалық порталы қазақ тілінде жаңалықтар тарататын және талдамалық материалдар жариялайтын ақпараттық ресурс.

Материалдар мен ақпараттарды портал брендін көрсетіп, гиперсілтеме жасаған жағдайда ғана қолдануға рұқсат етіледі. Ақпараттан мәтін,  мәтін бөлігі немесе дәйексөз алынғанда міндетті түрде тиісті сілтеме көрсетілуі керек. Жазбаша түрде рұқсат берілмеген жағдайда ресурс өнімдерін коммерциялық мақсаттарға пайдалануға жол берілмейді. Авторлар пікірі мен редакция көзқарасының сәйкес келе бермеуі мүмкін. Жарнама мен хабарландырулардың мазмұнына жарнама беруші жауапты.

E-mail: info@silteme.kz
Тел.: +7 778 442 84 13

Әлеуметтік желілер