«Қазақстанның ашық университеті» білім беру платформасында математика, физика, информатика сияқты ірі ғылым салаларымен қатар бизнесті жоспарлау, бағдарлама тілімен күрделі технологияларды модельдеу мен құрастыру сияқты салалардың кəсіби мамандарына арналған дəрістер де бар. Жоба қазақтілді аудиторияға арналған. Ондағы білім беру контентінің 80 пайызы қазақ тілінде.

Қарапайым тілмен түсіндіргенде, еліміздегі ең мықты деген жоғары оқу орындарының оқытушылары өздерінің дəрістерін осы платформаға салып отырады. Осы дəрістерді алу үшін ОpenU.kz сайтына тіркелсеңіз жеткілікті. Ол дəрістерді тек оқушылар мен студенттер ғана емес, қызығушылық танытқан кез келген азамат ала алады. Былтырдан бастап қолға алынған жобаны «Ұлттық аударма бюросы» (бұрынғы WikiBilim қоғамдық қоры) мен «Кселл» АҚ бірлесе жүзеге асыруда.

«Білім беру жүйесі бір орында тұрмайды. Біз Қазақстанда онлайн білім беру мəдениетін қалыптастыруымыз керек. Бұл жобаның көңілден шыққаны жəне қолданушылар саны мыңнан асқаны қазақстандықтардың digital платформалар арқылы білім алуға дайын екенін көрсетеді. Жоба қоғамның барлық мүшесіне білім алуға мүмкіндік беріп отырған əлеуметтік маңызды жоба болғандықтан, біздің компания қолдау көрсетуін жалғастыра береді», – дейді «Кселл» АҚ коммуникациялар бөлімінің жетекшісі Наталья Еськова.

«Қазіргі кезде мектептегі мұғалімдер мен жоғары оқу орнындағы оқытушылар дəріс барысында жаңа технологияларды қолдануға қорқады немесе қашқақтайды. Сондықтан жастардың білім алуға деген ынтасы төмен. Қазір барлық жасөспірімнің қолында смартфон бар. Ал біз ұсынған онлайн дəрістерді студенттер мен оқушылар, азаматтар өздеріне ыңғайлы жерде кез келген уақытта көре береді», – дейді «Ұлттық аударма бюросы» ҚҚ атқарушы директоры Рауан Кенжеханұлы.

Ресейде онлайн білім беру заң жүзінде қолға алынған. Қазақстанда онлайн білім беру заңға қайшы келмегенімен, заң жүзінде реттелмеген. Егер осы салада тиісті заңдар қабылданар болса қазақстандық студенттер университетке бармай-ақ онлайн дəріс тыңдай алуы мүмкін.

Қазіргі таңда үйден шықпай-ақ, «сиқырлы» смартфонның көмегімен түрлі қажеттілікті өтеуге болады. Халыққа қызмет көрсету орталығына бармай-ақ, анықтамаларды алып, үйде жатып киім дүкендеріне, тамақтану орталықтары мен тұрмыстық техника дүкендеріне тапсырыс беріп, қажет затыңызды алдыруға болады. Достарыңмен, жақындарыңмен сөйлесу үшін де арнайы кездесуге барудың қажеті жоқ. Енді сабақты да үйде оқып, емтиханды да қашықтықтан тапсыру мүмкіндігі тумақ. Бұл мүмкіндіктер жалқаулық синдромын тудыру үшін емес, пайдалы іске арналған уақытты көбейту мақсатында жасалып отырғанын ұмыт қалдырмасақ болғаны.

©Дана Маратова, "Ұлан" газеті