Тәуелсіздікті ту етуіміз керек – «Отандастар қоры» өкілі Н. Жұмағазиев
15.12.2019ж.

Тәуелсіздікті ту етуіміз керек – «Отандастар қоры» өкілі Н. Жұмағазиев

Бағалай білсең басыннан бақ қашпайды. Ал қастерлей білмесең, қасиеттің де құны қалмайды. «Толеранттылық танымы – жастар жолымен» атты республикалық мәдени-шығармашылық байқауының жеңімпаздарын марапаттау салтанатында «Отандастар қоры» КЕАҚ өкілі Нұрымжан Жұмағазиев осылай деді, деп хабарлайды silteme.kz AA.

«Азаттық деген асыл сөз. Тәуелсіздік деген тәтті ұғым.  Бұл – кешегі  ел үшін егеулі найза қолға алып, ұлтарақтай жер үшін ат үстінен түспеген батыр бабалардан қалған жәдігер сөз. Біз – ғасырлар бойы аңсап, еркіндікке қолы жеткен, арман-мұраты тең өрілген, тай қазаны ортаймаған қазақ деген байтақ ел, дана халықпыз. Міне, сол бақыт түндігін ашқан Тәуелсіздік бүгінде халқымызға тәңір сыйлаған құт-береке. Осы жалауы желбіреген 28 жылда қазақ халқы  асыққанына  жетіп, аңсағанын көрді. Өткенге салауат. Дегенмен, қазаққа тағдар талай қауқыметті көрсетті. Алайда, біз сынған жоқпыз: Тар жол, тайғақ кешулерде шыңдалдық, шыңға өрледік», - деп атап өтті ол.

Мұнан кейін Н.Жұмағазиев өзінің жеке пайымдарын ортаға салды:

«Бүгінде мен «Отандастар» қорында еңбек етемін. Шетелдегі қазақтармен жүздесіп тұрамын, әңгімесін тыңдаймын, мәселесін шешуге жәрдемдесемін. Жуырда бір қандас қарындасымыз бен бір бауырымыз қоғамдық қабылдауға келіп өз проблемасымен бөлісті. Қытайда туып өскен қарындасымыз қазір Египетте оқып жүр екен. Қытайда тұратын әкесі мен шешесі жақында белгісіз себептермен абақтыға жабылыпты. Мән-жайды біліп, сол жаққа барайын десе қауіп күшті. Мұны да қамап қоюы мүмкін. Қазір қарындасымыз Дүниежүзі қазақтары қауымдастығының шақыртуымен Қазақстанда жүр. Шетел азаматы болғандықтан, тарихи Отанында 3 ай ғана жүруіне құқығы бар. Осы аз уақыт ішінде ол Қазақстан Республикасының азаматтығын алып үлгерсе, елде қалып еркін өмір сүре алады. Ал азаматтық алу оңай жұмыс емес», - деп ойын жалғады «Отандастар қоры» өкілі.

Оның айтуынша, бұл процесті жылдамдатудың бір жолы қазақстандық азаматпен некеге тұру. Қарындасымыздың қасына еріп келген жас жігіт болашақ жары екен. Осылайша некеге тұрып, Қазақстанның азаматтығын алуға әрекет етуде. Егер бұл қарындасымыз Қазақстан азаматтығын алса, Қытай да, басқа мемлекетте оның құқығына тиісе алмайды.

«Міне, Тәуелсіздіктің айқын көрінісі. Бағалай білсең басыннан бақ қашпайды. Ал қастерлей білмесең, қасиеттің де құны қалмайды. Ендеше, біз Тәуелсіздікті ту етуіміз керек. Керек деймін ғой, жоқ, міндеттіміз!», - деп сөзін түйіндеді Н.Жұмағазиев.  

 

Фотолар тізбесі:

 

Silteme.kz ақпараттық-сараптамалық порталы қазақ тілінде жаңалықтар тарататын және талдамалық материалдар жариялайтын ақпараттық ресурс.

Материалдар мен ақпараттарды портал брендін көрсетіп, гиперсілтеме жасаған жағдайда ғана қолдануға рұқсат етіледі. Ақпараттан мәтін,  мәтін бөлігі немесе дәйексөз алынғанда міндетті түрде тиісті сілтеме көрсетілуі керек. Жазбаша түрде рұқсат берілмеген жағдайда ресурс өнімдерін коммерциялық мақсаттарға пайдалануға жол берілмейді. Авторлар пікірі мен редакция көзқарасының сәйкес келе бермеуі мүмкін. Жарнама мен хабарландырулардың мазмұнына жарнама беруші жауапты.

E-mail: info@silteme.kz
Тел.: +7 778 442 84 13

Әлеуметтік желілер