Шараны «Халық маркасы» федерациясы мен «Еуразиялық Іскер Одағы» ұйымдастырған. Жобаның мақсаты – отандық тауар өндірушілерге қолдау көрсету. «Халық маркасы» федерациясының президенті Римма Тәжібаеваның айтуынша, алдағы уақытта аталмыш павильонға еліміздің тек үздік тауарлары қойылады.

«Қазіргі таңда павильонға 20-дан астам бренд өз өнімдерін ұсынып отыр. Ал «ЭКСПО-2017» халықаралық көрмесіне дейін жалпы үздік 100 бренд өз өнімін көрсетеді деп жоспарлап отырмыз. Көпшілік назарына ұсынылған тауарлардың әлеуеті жоғары, экспортқа бағытталған», - деді ол.

Оның айтуынша, павиольонда кәсіпкерлер үшін тиісті жағдай жасалған.

«Біз компанияларға өз жұмыстарын одан әрі белсенді жүргізуге жағдай жасап отырмыз. Олар осында өз өнімін қою үшін 1 жылға 300 мың теңге төлейді. Бұл қаржы тиісті қызметті көрсететін азаматтарға беріледі. Яғни әрбір кәсіпкерден түскен ақша сатушыға, осы жерде қауіпсіздік қызметіне жауап беретін күзетшіге беріледі», - деді аталмыш федерация президенті.

Сондай-ақ, шараны ұйымдастырушы павильонға қойылған отандық өнімдерге шетелдік қонақтар тарапынан сұраныс жоғары болатындығын атап өтті.

«Астана әкімдігі еліміз үшін маңызды көрменің туристік картасын жасаған уақытта біз өтінішімізді білдірдік. Біздің павильон халықаралық көрменің туристік картасына кіріп отыр. Сондықтан шетелдік қонақтар осы аумаққа келеді деген сенімдеміз. Себебі, мұнда қазақтың ұлттық өнімдері мен тағамдары және сапалы тауарлар қойылады», - деді Римма Тәжібаев.

Сонымен қатар, шараға «Жарылқасым» шаруа қожалығының директоры Нағима Жарылқасымова қатысты. Ол жаңадан ашылған павильонға өз өнімін қойған. Зейнетке шыққан ұстаз бағын бизнесте сынап көргісі келеді. Осылайша кәсіпкер жаңа технология арқылы құрттың 5 түрін жасаған екен.

«Бұл жерде табиғи өнімдерден жасалған 5 түрлі құрт тұр. Олар қызылша, қымыздық, асқабақ, жаңғақтан және ірімшіктен жасалған. Мектепте жұмыс істегенмін. Зейнеткерлікке биыл шықтым. Өнімдерімді енді ғана патенттеп жатырмын. «ЭКСПО-2017» көрмесі кезінде өз өнімімді, яғни қазақтың ұлттық тағамын замануи технологиялар арқылы жаңа брендке айналдырғым келеді. Себебі, бұл ата-бабамыздан келе жатқан асыл мұра», - деп түйіндеді сөзін кәсіпкер.