Арнайы сыйлық тағайындалмақ: «Қазақ» газетінің жарық көргеніне алдағы жылы 105 жыл толады
21.12.2017, 09:07

Арнайы сыйлық тағайындалмақ: «Қазақ» газетінің жарық көргеніне алдағы жылы 105 жыл толады

Мемлекет қолдауының арқасында Интернет кеңістігінде ұлттық ақпараттық қоғам қалыптастыру мәселесі біртіндеп шешімін тауып келеді. Мысалы, біраз жыл бұрын салалық БАҚ құру өзекті мәселе болса, бұл бағыттағы жұмыстар өз нәтижесін бере бастады. Бұл туралы ҚР Ақпарат және коммуникациялар министрі Дәурен Абаев Қазақ сайттары редакторларының форумында мәлімдеді, деп хабарлайды silteme.kz.

«Атап айтсақ, тарихымызды түгендейтін National Digital History порталы іске қосылды. Әдеби мұраларымызды жинақтайтын Әдебиет порталы жұмыс істеуде. Танымдық El.kz порталы, тек қана қазақ тілінде хабар тарататын Baq.kz ақпарат агенттігінің жұмысы жүйелі жолға қойылды. Қоғамға сөзі өтімді, сан саланы қамтыған интернет-ресурстар жыл өткен сайын көбейіп келеді. Осының барлығы мемлекет қолдауының арқасында жүзеге асуда», - деп атап өтті ол.

Сонымен қатар, министр осы салада еңбек етіп жүрген мамандардың еңбегінің де ескеріліп жатқанын тілге тиек етті.

«Өздеріңізге мәлім, биылғы жылы Ақпарат  және коммуникациялар Министрлігі осы саланың үздіктеріне арналған «Үркер» сыйлығын тағайындады. Бұл шара жалғасын табатын болады», - деп ойын жалғады Д.Абаев.

Бұдан бөлек, сала басшысы сүйіншілейтін жайттардың барлығын да атады.

«Бүгінгі жиынды пайдаланып, тағы бір жаңалықты жеткізгім келеді. Ұлттық баспасөздің бастауында тұрған «Қазақ» газетінің жарық көргеніне алдағы жылы 105 жыл толады. Осыған орай, «Үркер» байқауы аясында «Қазақ» газеті атындағы арнайы сыйлық тағайындауды жоспарлап отырмыз. Жалпы, қазақтілді ақпарат құралдарының бүгінгідей ауқымды шарада бас қосуы мемлекет тарапынан да, қоғам тарапынан да бұқаралық коммуникация мәселелеріне барынша көңіл бөліне бастағанын көрсетеді», - деп түйіндеді сөзін министр.

Айта кетейік, аталмыш шараға «Қазақстан» РТРК АҚ Басқарма төрағасы Ерлан Қарин, Қазақстандағы АҚШ елшісі Джордж Крол, Қазақстан баспасөз клубының атқарушы директоры Сәкен Балбаев, сондай-ақ, журналистер, веб-редакторлар, блоггерлер қатысты.

Форум аясында осы саланың білікті мамандары қазақ тілді сайттарға байланысты өз ойларын ортаға салып, тәжірибелерімен бөлісті. Бұл форум қазақтілді сайттардың ақпарат кеңістігіндегі орны мен ерекшеліктерін айқындап, контент сапасы, оқырман талабы, жарнама мен қаржыландыру, жаңа медиа мен қазіргі трендтер, жаңа технологиялар сияқты тақырыптарды қамтыды.

Silteme.kz ақпараттық-сараптамалық порталы қазақ тілінде жаңалықтар тарататын және талдамалық материалдар жариялайтын ақпараттық ресурс.

Материалдар мен ақпараттарды портал брендін көрсетіп, гиперсілтеме жасаған жағдайда ғана қолдануға рұқсат етіледі. Ақпараттан мәтін,  мәтін бөлігі немесе дәйексөз алынғанда міндетті түрде тиісті сілтеме көрсетілуі керек. Жазбаша түрде рұқсат берілмеген жағдайда ресурс өнімдерін коммерциялық мақсаттарға пайдалануға жол берілмейді. Авторлар пікірі мен редакция көзқарасының сәйкес келе бермеуі мүмкін. Жарнама мен хабарландырулардың мазмұнына жарнама беруші жауапты.

E-mail: info@silteme.kz
Тел.: +7 778 442 84 13

Әлеуметтік желілер