Ақмола облысы бойынша халыққа қызмет көрсету департаментінің мемлекеттік қызмет көрсетуді бақылау бөлімінің бас маманы Жазира Сыздықованың айтуынша, «Азаматтарға арналған Үкімет» пилоттық жобасы халық пен мемлекеттің арасындағы байланысының жаңа түрі. Осы арқылы мемлекеттік органдар халыққа сапалы әрі жедел қызмет түрлерін көрсете алады.

«Осындай мемлекеттік қызмет түрлерін алу үшін тұрғындар мобильді азаматтар базасында тіркелуі тиіс. Оны кез келген адам электронды үкімет порталында жеке кабинеті арқылы мобильді телефон нөмірін өзінің ЖСН-не (жеке сәйкестендіру нөмірі) бекітуі керек. Оны әр адам өзі немесе ХҚО «Connection point» өзіне өзі қызмет көрсету секторында кеңесшінің көмегімен жүзеге асыра алады.

Қазіргі кезде, Ақмола облысында осындай қызмет түрін 47 жас ана қолданып, 143 құттықтау «смс» хабарлама жолданды. Оның ішінде Гүлжайна Сәбитова есімді нәресте бірінші болып «смс» хабарлама арқылы туу туралы куәлік алды», - деді Жазира Сыздықова.

Сонымен қатар, брифингте Ақмола облысындағы балабақшаларға біртұтас кезекті енгізу мәселесі де сөз болды. Жалпы, осы күні облыста 601 мектепке дейінгі білім беру мекемесі жұмыс істейді. Оның ішінде 228-і балабақша, 373-і шағын орталық. Жалпы, 1-6 жасқа дейінгілер арасында 37005 бала немесе 66,4 пайызы (оның ішінде 3-6 аралығындағы 31445 бала немесе 97,7 пайыз) мектепке дейінгі біліммен қамтамасыз етілген.

Сонымен қатар, өңірде жекеменшік балабақшалардың да саны артып келеді. Қазіргі кезде, облыста барлығы 96 жекеменшік балабақша тіркелген. Мектепке дейінгі біліммен қамтамасыз ету мақсатында өткен жылы пайдалануға берілген балабақшалардың есебінен 1896 орын ашылды.