Айта кетейік, аса ауыр салмақта өнер көрсететін отандасымыздың қарсыласы Баходир Жалолов болады. Бұл екі боксшы 2015 жылы Болгарияда өткен бәсеке кездесіп, ол кезде қазақстандық боксшының мерейі үстем болған еді. 

- Бұл кездесуге дайындығым жақсы өтті. Қазақстан құрамасымен бірге AIBA академиясында жаттығу өткіздік. Жаттығу кезінде физикалық дайындығымызға ерекше көңіл бөлдік. Кейін Германия мен АҚШ боксшылармен дайындалуға мүмкіндік болды. Сондықтан алдағы кездесуге толық дайынмын.

Бұл кездесуге бапкерлердің мені шақырғаны күтпеген жағдай болды дей алмаймын. Өйткені, маусымның басында мені шақыруымыз мүмкін деп ескертілген болатын. Бұйырса, ертең жеңіске жетіп, командаға өз пайдамды тигіземін деп отырмын, - дейді Қоңқабаев. 

- WSB жобасында екінші жыл өнер көрсетіп жатырсыз. Бұл бәсекенің жүйесіне үйреніп қалдыңыз ба?

- Өткен жылы расында мен WSB жобасында жұдырықтастым. Бұл жобада жұдырықтасудың өз ерекшеліктері бар. Жекпе-жек ұзаққа созылады. Дайындық та басқаша өтеді. Басында үйрену қиын болды. Қазір төселіп алдым. 

- Қарсыласыңызбен бұған дейін кездестіңіз бе?

- 2015 жылы мен Жалоловпен Болагияда жыл сайын өтетін Strandja турнирінің финалында кездестім. Мен ол кездесуде нокаутпен жеңіске жеттім. Сондықтан ертең де жеңіске жетемін деп отырмын. Қарсыласымның мықты және осал тұстарының барлығын білемін деп айта алмаймын. Өйткені, бір рет ғана жұдырықтастық. Оның өзі екі жыл бұрын. Енл\ді ертең не боларын ринг көрсетеді. 

Еске салайық, "Астана арландары" мен "Өзбек жолбарыстары" арасындағы кездесу 18 ақпан күні Талдықорған қаласындағы "Жастар" спорт кешенінде өтеді. Жекпе-жектер Астана уақыты бойынша 18:00-де басталады. 

Дерек көзі: kaz.vesti.kz