Айта кеткен ләзім, көрме билеттері зияткерлік мектеп­тердің оқушылары ұйым­дас­тырған қайырымдылық жәр­мең­келерінен түскен қар­жыға алынған болатын. Осы шара арқылы тұрмысы төмен отбасылардың балалары жаз­ғы демалыстарын ЭКСПО қа­быр­ғасында ұмытылмастай өткізбек. Аталған шараға, сонымен бірге, «Халық» қайырымдылық қоры демеуші болып отыр. Сал­танатты жиында «Назарбаев зияткердік мектептері» ДББҰ басқарма төрайымы Күләш Шәмшидинова мен Халық банкі Астана қалалық филиалы­ның директоры Жанар Рахымова ЭКСПО-ның жас елшілерін құттықтады. Күләш Ноғатайқызының айтуынша, Қазақстанның «Нұр Әлем» бас экспозициясында, Қытай, Германия, Оңтүстік Корея, Ресей және басқа да елдердің павильондарында ұсынылған болашақ энергиясы ЭКСПО-ның жас елшілеріне жаңа әлем қуатының бейнесін көрсететін болады. Сонымен бірге, балалардың «Бәйтерек», «Астана-Опера», «Думан» океанариумы, «Атамекен» этноме­мо­риалдық кешені сияқты елорданың көрікті орындарына саяхаты, «Нұрлы жол» желекжолымен серуендеу және Есіл өзенінде қайықпен жүзу жоспарланып отыр. Халық банкінде оқушылар теңгенің және қаржы нарығы­ның пайда болу тарихымен таныспақ. Сондай-ақ, спорт­тық ойындар, ғылыми және шығармашылық жобаларды әзірлеу қарастырылған. Оқу­шылар бос уақытта зият­керлік мектептер үшін дәс­түрлі сабаққа айналған қыш қолөнері, әуе көлігін модельдеу, өнер дизайны және дра­ма­лық өнерге машық­тану­мен шұғылданады. Атал­ған шара­да ЭКСПО көр­ме­сінің алғаш­қы тартуы, яғни жаңа оқу жылына арналған оқу құрал­дары салынған сөмкеге Семей өңірінен келген жазғы мек­теп­тің ең жас қатысушысы Таң­шебер Амантай ие болды.

Думан АНАШ, «Егемен Қазақстан»