Конференцияда белгілі болғандай, көрмеде еріктілер ретінде 46 мемлекеттің өкілдері қызмет етуде. Бұдан бөлек, шараны халықаралық деңгейде насихаттауда елеулі жұмыстар атқарылып, бүгінге дейін 1,5 млрд адам қамтылған, ал көрме соңына дейін бұл көрсеткіш 2,5 млрд адамға жетпек. ЭКСПО-2017 жайындағы ақпарат халықаралық ірі әуежайларда және өзге де маңызды нысандарда орналастырылуда. Сондай-ақ, «Google» компаниясымен стратегиялық ынтымақтастық іске асырылып, жарнамалар алдыңғы қатарлы әлемдік телеарналарда көрсетілуде. ЭКСПО-2017 көрмесінің салтанатты ашылуынан шетелдік БАҚ-тың 800-ден астам өкілі хабар таратты. Көптеген елдерде бұл шара тікелей эфирде көрсетілді», деді «Астана ЭКСПО-2017» ұлттық компаниясының басқарма төрағасы Ахметжан Есімов. Дүниежүзілік конференцияда Астана әкімі Әсет Исекешев сөз сөйлеп, елордада баламалы энергия көздерінің 50 нысаны орнатылғанын баяндады. «Қалада баламалы энергия көздерінің 50 нысаны жұмыс істеуде. Мысалы, гүл бейнесінде жасалған «Smart flower» күн энергиясын энергияға айналдыратын құрал ноухау болды. Сонымен қатар, автобус аялдамалары, бағдаршамдар, технологиялық орындықтар, парктер мен скверлердегі шамдар күннен қуат алады. Әрине, мұның барлығы шағын жобалар екені белгілі. Бірақ бұл жаңаша ойлау үшін қажет, сондай-ақ ірі жобаларды жүзеге асыру үшін негізгі іргетас болады. Біз ірі жобаларды да жүзеге асырып жатырмыз», деді қала басшысы. Әсет Исекешев алдағы уақытта Астана көшелеріндегі шамдардың энергия үнемдейтін шамдарға ауыстырылатынын айтты. «Ауқымды түрде қаладағы шамдарды энергиялық жағынан тиімді шамдарға алмастырамыз. Сонымен қатар, кезең-кезеңмен әлеуметтік нысандарда – мектептерде, балабақшаларда, ауруханаларда энергия үнемдеуге бағытталған бағдарламалар жүзеге асырылады. Энергия үнемдеу институтымен оның тиімділігін арттыруға бағытталған кешенді жоспар жасалды. Ал Экологиялық тұрақтылықты сақтау үшін бірқатар төмен көміртекті жобаны жүзеге асыруды жоспарлап отырмыз. Оның ішінде төмен көміртекті көліктерге көшу де бар», деді әкім. Елорда басшысының айтуынша, 2020 жылға қарай Астана Еуразия кеңістігіндегі туристер үшін ең тартымды қала болмақ. Сонымен қатар, әртүрлі форумдар мен саммиттер, іскерлік кездесулер мен мәдени-спорттық шаралар өтетін басты орталықтың біріне айналуы тиіс. Осы мақсатта әуежай, темір жол вокзалы, қонақүйлер мен басқа нысандар, біз сөзбен айтқанда, инфрақұрылым сапалы әрі жан-жақты жетілдіріліп, дамуда. Асхат РАЙҚҰЛ, «Егемен Қазақстан»
Асхат РАЙҚҰЛ,
«Егемен Қазақстан»
Silteme.kz ақпараттық-сараптамалық порталы қазақ тілінде жаңалықтар тарататын және талдамалық материалдар жариялайтын ақпараттық ресурс.