ҚР мәдениет және спорт министрі Арыстанбек Мұхамедиұлы жоба Мемлекет басшысының «Бес институционалдық реформаны іске асырудың 100 нақты қадамы» Ұлт жоспарының 86-қадамын жүзеге асыру аясында әзірленгенін айтып өтті. Тұжырымдаманы екі кезең бойынша: 2018-2020 жылдары және 2021-2023 жылдары іске асыру көзделген.

Тұжырымдама бойынша алты өңірлік мәдени-туристік кластер құру жоспарда бар: «Астана – Еуразия жүрегі», «Алматы – Қазақстанның еркін мәдени аймағы», «Алтай інжу маржаны», «Ұлы Жібек жолын жандандыру», «Каспий қақпасы», «Табиғат пен көшпелі мәдениеттің біртұтастығы».

Өңірлердің ерекшеліктерін ескере отырып, туризмнің жаңа бағыттары дамтитын болады: сакралды, кемпингті, гастрономиялық, аңшылық, этнографиялық, әлеуметтік және т. б.  Жағымды имидж қалыптастыру мен маркетинг жұмыстарын жүргізу үшін «Қазақтуризм» ұйымы құрылады.

Үкімет туристерге Қазақстанға келуге жағдайларды барынша жеңілдету үшін визалық-көші-қон саясатын ырықтандыру мен әуе қатынастарын дамыту бойынша жұмыстарды жалғастырып жатыр. Бүгінгі таңда елге визасыз кіре алатын елдердің тізімі 63 мемлекетке дейін ұлғайтылды, ҚХР азаматтары үшін 72 сағаттық визасыз режим және Астана әуежайында «ашық аспан» режимі қолданыста. Сондай-ақ, көші-қон полициясында шетелдіктерді тіркеу, электронды визаларды енгізу, әуе қатынастарын әртараптандыру мәселелерін шешу қажет.

ҚР Премьер-Министрі Бақытжан Сағынтаевтың тапсырмасы бойынша, ҚР МСМ отандық туристік өнімдер маркетингінің тиімді моделін әзірлеуде, сонымен қатар бұл жеке брендті құру мен еліміздің туристік әлеуетін халықаралық аренада ілгерілету арқылы жүзеге асырылып жатыр.

Үкімет мәселелерді қарау қорытындысы бойынша туристік саланы дамытудың 2023 жылға дейінгі тұжырымдамасын қабылдады.